لاہور کے علاقے ساندہ میں چوروں نے جیولر شاپ کا صفایا کر دیا

لاہور : ساندہ کے چاندنی چوک پر واقع جیولر شاپ میں رات گئے نامعلوم افراد تالے توڑ کر اندر داخل ہوئے اور5 کروڑ روپے مالیت کا سونا چوری کرکے باآسانی فرارہوگئے۔

تفصیلات کے مطابق نامعلوم افراد دکان کے تالے توڑ کر اندر داخل ہوئے اور گیس کٹر سے تجوریوں کوکاٹ کر5 کروڑ روپے مالیت کا سونا اور23 لاکھ روپے کی نقدی لے اڑے۔

دکان کے مالک حاجی تنویر کے مطابق 5 کلو سونا چوری کیا گیا ہے جس کی مالیت 5 کروڑ سے
زائد بنتی ہے جب کہ چور دکان کی تجوریوں میں رکھی نقدی بھی لے اُڑے۔

ڈکیتی کی اطلاع ملتے ہی پولیس جائے وقوعہ پر پہنچ گئی اور ابتدائی شواہد اکھٹے کرنا شروع کر دیے جب کہ موثر تحقیقات کے لیے فرانزک لیب کے اہلکار کو بھی طلب کر لیا گیا ہے،فرانزک لیب اہلکار جائے وقوعہ سے اہم شواہد اکٹھے کرنے اور تحقیقات میں پولیس کی سائینسی بنیاد پرمدد کرنے میں مصروف ہے۔

پولیس کا کہنا ہے کہ اکھٹے کیے گئے شواہد کی روشنی میں جلد ملزمان تک پہنچ جائیں گے اس حوالے سے تاجر برادری سے بھی تعاون کی درخواست ہے تا کہ پولیس مجرموں کا قلع قمع کر سکے۔

اس موقع پر مارکیٹ کے تاجروں کا کہنا تھا کہ آئے دن کی چوریوں اور ڈکیتیوں نے کاروبار کرنا مشکل کردیا ہے اور حکومت کاروباری حضرات کو تحفظ دینے میں مکمل ناکام ہو گئی ہے۔